Гэнэхэн байна даа

Гэнэхэн байна даа

Цас чи дээрээс зөөлөн будрахдаа
Цагаанаар бүхнийг будна гэж сэтгээ юу
Цайлган байна даа цайлган байна
Хар санаа хээрийн түймэр болон тархаж
Хаа сайгүй орилолдон бүжиж байна

Бороо чи дээрээс шиврэхдээ
Бохир бүхнийг угаана гэж бодоо юу
Болоогүй байна даа болоогүй байна
Шулам дүрт шуналын сэтгэл цаана чинь
Шүхэр дор алгаа ташин дэвхцэж байна

Салхи чи аяархан сэвэлзэхдээ
Саар бүхнийг хийсгэнэ гэж санаа юу
Гэнэн байна даа гэнэн байна
Баг өмссөн адын бодол цаана чинь
Байшин дотроо чамайг шоолон инээлдэж байна


2010.10.28 Токио гэртээ. Энка Энхбаяр

Хяргас нуур

Газар дэлхийд ойсон номин хөх тэнгэр
Галуу шувууд цугласан номхон дөлгөөн рашаан
Хүмүүн заяаг тэтгэх хүслийн хязгаар шиг Хяргас нуур
Хүлээхийн жаргалыг амсуулах холын хайртай амин нуур

Эхийн хэвлий дэх арван сарыг сануулах эрдэнэ минь
Ээжийн аялах зөөлөн бүүвэйг хөгжимдөх долгио минь
Эргээд хоёулаа удахгүй ээж хүү шиг уулзая даа



2010.08.18 Хяргас нуур, Хэцүү хад

Бодолгүй чанадын элсэн далайд
Болоогүй холын салхи исгэрнэ

2010.09.30

Чимээ...

Чихэнд

Компьютерь аахилах
Кондишн уухилах

Чимээ...

Бодолд

Өчигдөр хурхирах
Өнөөдөр архирах
Маргааш бархирах

Чимээ...

Цээжинд

Анхилуун уянгалах
Танхилуун инээлдэх
Энхрий дуулах
Эндээс чагнах

Чимээ...

2010.02.07 00:33 Энхбаяр , Токио

Ирээдүйн найз охиндоо

Ирээдүйн найз охиндоо

Эрхэм хүндэт Энхбаярын найз охин чамд
Энэ өдрийн мэнд хүргэе
Анд минь араас чинь
Утас шиг хөвөрсөн эсэх
Аль эсвэл чи өмнө нь
Ухаан балартсан эсэх
Энэ бүгдийг би асуухгүй ээ
Энхбаяртай л чи одоо цуг байвал болох нь тэр

Хайрт хүндэт Энхбаярын найз охин чамд
Хацар дүүрэн инээмсэглэлээр бэлэг барья
Хайртай гэж шууд хэлэхдээ
Наадах чинь маруухан
Хамаг сэтгэлээ уудлахдаа
Наадах чинь хайнгадуухан
Үсийг чинь үнэрлээд зөөлөн илбэх бүрт
Үг хүлээлгүй хайртай гэдгийн санаарай

Үүрдийн нөхөр Энхбаярын минь найз охин чамайг
Үнэн сэтгэлийн угаас чанга тэврэе
Чамтай уулзатлаа бичсэн шүлэг бүрээс нь
Чанга хатуугаар эзнийг нь бүү нэхээрэй
Үнэндээ найз минь шүлэглэхээс бусдыг чадаагүй юм
Үүр шөнийн ододтой ярилцахаас бусдыг хийгээгүй юм
Арьсаа хамгаалах гэж би бичсэнгүй
Андыг минь илүү ихээр хайрлаарай

2010.02.05 20:00 Токио Энхбаяр

Асуулт

Асуулт

Чиний бодлын байшин дахь
Миний нэгэн өрөө
Чинь зүрхний угаас
Чимж гоёсон тасалгаа юу

Чиний бодлын байшин дахь
Миний нэгэн өрөө
Чамд эртний зүйлийг
Чандалж хадгалсан агуулах уу

Чиний бодлын байшин дахь
Миний нэгэн өрөө
Цэнгэг агаар хааяа амьсгалах
Цэвэрхэн бяцхан тагт уу

Чиний бодлын байшин дахь
Миний нэгэн өрөө
Цааш алхаж зүрхлэмгүй
Цаг зуурын коридор уу

Чиний бодлын байшин дахь
Миний нэгэн өрөө
Бусдад харуулалгүй хаасан
Булангийн цоожтой шүүгээ юу

Чиний бодлын байшин дахь
Миний нэгэн өрөө
Биеэн барилгүй долгиолон
Вино шимэлцэх ванн уу

Чиний бодлын байшин дахь
Миний нэгэн өрөө
Өөрт чинь бэлдсэн өрөөтэй минь
Өөгүй яг адилхан бол
Өнөөдөртөө багтаад би
Өргөөрүү чинь нүүмээр байна

2010.01.19 Токио Цамхаад Самдангийн Энхбаяр

4 бодол

4 бодол

Ялгадас үнэрлэсэн
Ярвагар царай
Нэг инээгээсэй
Яс хөлдөөм
Язалзсан инээд
Нэг уурлаасай
Ялаа үүрлэм
Яршигтай ам
Нэг хамхиасай
Ямар ч хувиралгүй
Япон робот
Нэг нээгээсэй

Цамхаад Самдан Энхбаяр 2010.01.14 16:11 Токио

Санаж байна

Санаж байна

Хүсээд л харьчихгүй алсын орноос
Хүү нь гэрээ санан үгүйлнэ

Адуу тургилах буйдхан хөдөө талд
Аав минь намайг харуулдан суугаа
Эсгий гэртээ дээлийг минь оён
Ээж минь намайг хүлээж суугаа

Хүсээд л харьчихгүй алсын орноос
Хүү нь гэрээ санан үгүйлнэ

Нүцгэн хөлөөр наадан гүйсэн
Газар шороо минь намайг харуулдан байгаа
Нүүдлийн шувуудын зуурдын диваажин
Гайхамшигт нуур минь намайг хүлээж байгаа

Хүсээд л харьчихгүй алсын орноос
Хүү нь Монголоо санан үгүйлнэ

Бүүвэйлж саатуулсан эгч нар минь
Бүлтгэр дүүгээ хүлээж суугаа
Бүтэхгүй жаалуудаас хамгаалдаг ах нар минь
Битүүхэн дүүгээ харуулдан суугаа

Санаад л харьчихгүй тэртээх орноос
Санаа алдан та нарыгаа үгүйлнэ

Бууж өнгөрсөн овоо болгон
Буцаж ирэхийг минь харуулдан байгаа
Ангаагаа тайлдаг ариун булаг минь
Араас минь хараад хүлээж байгаа

Бодоод л оччихгүй холын орноос
Би нутгаа санан гансран сууна

Худал унахад баярладаг зулзаганууд минь
Хоног тоолон ахыгаа харуулдан суугаа
Мөрөөр татдаг хөөрхөн охин дүү минь
Магнайд хүрээд ахыгаа хүлээж суугаа

Алхаад л харьчихгүй алсын орноос
Ах нь дүү нараа санан үгүйлж байна

Хээр талын ариун салхи
Хззээ ирэхийг минь харуулдан байгаа
Хэнэггүй чангаар орилдог уул
Хүн байна уу гэж ахин дэггүйтэхийг минь хүлээж суугаа



Цамхаад Самдан Энхбаяр 2010.01.14 00:00 цаг Токио

Тэр

Тэр

Өөлөх аргагүй ялдам гүнжээс
Өвдөг сөгдөн хайр гуйв ... Уучлаарай


Тэр

Нум агссан тэнгэрийн элчээс
Нулимс дуслуулан хэрүүл гуйв... Уучлаарай


Тэр

Энэлэлийн далайд хөл алдаж
Эрлэгээс зуурдын үхэл гуйв ...Уучлаарай


Үг гарахгүй хоолойд нь тээглэж
Үйл олдохгүй орондоо бэтгэрэв
Өөрийнхөө заяагүйд гунин гансарч
Өчигдөрийн хариуг бодон бодон нулимс унагав ...


2009.12.12

Бэлдэж бай

Зүрхэндээ надад зай бэлд
Зүүдэндээ намайг олж хар
Уруул чинь одоо өөр хүнийх байлаа ч
Уулзахдаа чи надруу инээмсэглэ

Сэтгэлдээ надад зай бэлд
Сэмхэн дотроо намайг хүлээ
Одоо чи өөр хүнтэй байлаа ч
Орон дотроо намайг мөрөөд

Хэзээ нэгэн цагт бид учирч
Хэн хэнээ чангаар тэвэрнэ
Хаа нэгтээ бид тааралдаж
Халуу дүүгтэл удаанаар үнсэлцэнэ

2009.12.03 20:52 Токио гэртээ Энхбаяр

Дэрчийлээ

Хүйтэн байна
Өрөө минь хүйтэн байна
Хямдхан байсан
Өргөө минь хямдхан байсан
Токёод арван таван хэм
Нэмэх
Толгойдох чих арван таван хэм
Хасах

Хүйтэн дээрээсээ бороо орж
Хүний үр энд дэрчийх нь
Токёод арван таван хэм
нэмэх
Толгойдох чих хорин таван хэм
Хасах

Чингисийн удам хасарын ач
Чийрэг монгол японд хөлдөж
Дэвэн дэлхийгээр онигоо болоод яахав
Данбоогоо асаая доо

Enkhbayar

Үгүй шүү

Хорь гартлаа ганцаар явсан
Хонгор насаа ганцаар туулсан
Хоёрын оронд нэгээрээ хөрвөөсөн
Хосын өрөөнд нэгээрээ дуулсан

Ганцаараа байхад
Галсансүхээс толь ичэхгүй
Нэгээрээ байхад
Надаас нар зугтаахгүй

Хүслээ хангах гэж
Хүний охинтой үерхэхгүй
Дураа дарах гэж
Дусал ч магтаал унагахгүй

Хайргүй байж
Хамт унтахгүй
Сэтгэлгүй байж
Секс хийхгүй

Ганцаараа байхад ч
Гадаа шувуу жиргэнэ
Нэгээрээ байсан ч
Нэжгээд жаргал олдоно

2009.11.24 гэртээ Энхбаяр

Замбуулин

Газар дэлхийг чичрүүлэх боргиотой
Ган төмрийг нугалах эрчлээтэй
Урсмал нуурны уснаас нь амсав
Уруулд минь харин гуниг мэдрэгдэв

Гол мөрөн гэж би андуурчээ
Гоо үзэсгэлэн гэж би эндүүрчээ
Алгаараа утгаж амандаа хүргэсэн минь
Алагхан замбуулингаас бөмбөрсөн нулимс ажээ

Түмэн зовлонгоос би багахан амтлаад
Түгдрэн балмагдаж хэсэг суув
Сая шаналалаас би өчүүхэн хүртээд
Санаа алдаж бодол бодов ....

Бодол бодон суухад минь
Болор мөнгөн туяа цацруулсан хөгжим сонстов
Санаа алдан суухад минь
Солонгын долоон өнгөт гайхамшигт хөгжим цуурайтав

Гэрэл цацруулсан тэр хөгжим харин
Гэрэлт хорвоогийн инээд байж
Өнгө өнгийн гэрэл цацруулсан тэр хөгжим харин
Өнөөх замбуулингийн инээд байж ...

2009.10.29

Ялаа

Ялаа
Дэмийрсэн бүдүүн ялаа
Дэлхийгээр нэг орилов
Дэрвэгэр хоёр дэлбээ минь
Дэрсхийн нистэл бархирав

Галзуурсан тарган ялаа
Гайхуулан чангаар бархирав
Галтогоо коридор том өрөөгөөр
Ганганан хангинаж бүргэд адил дүүлэв

Байн байн намайг оролдож
Басаж ихээр доромжлов
Үе үе намайг ирвэгнүүлж
Үнэхээр аргыг минь барав

Хайрт минь асан бол
Хариуд нь би гижигдэхсэн
Анд минь асан бол
Андаж байгаад хариуг нь барихсан

Үмхий муу ялаатай юу ярихав
Өөрийнхөө хэмжээг мэдэж
Үх чи ингээд МАЙ !

Би дуртай

Би дуртай

Өглөө бүр би нарыг харах дуртай
Өдөн дэрэн дээрээсээ цонхруу ширтэх дуртай
Наран яг адилхан гийх ч өнөөдөр бол өөр
Намайг яг адилхан ээх ч өнөөдөр бүр ч таатай

Өдөр бүр би тэнгэрийг ширтэх дуртай
Үүлэн доогуур дүүлэн нисэх шувуудыг ажих дуртай
Тэнгэр үргэлж хувирч олон янз болох ч
Тэндээ л жигүүртэн шувууд илүү эрх чөлөөтэй

Орой бүр би оддыг харах дуртай
Онцгой гэрэлтэх нэгэнтэй нь бодлоороо ярилцах дуртай
Одод хааяа үүлэн цаагуур орж надаас нуугдахад
Олон мянгаараа нь гялалздаг Монголоо нь би санан гансрах дуртай

Шөнө бүр би хайртай хүмүүстэйгээ уулзах дуртай
Шүлэг нойрон дахь драмын гол дүрд тоглох дуртай
Найруулагч нь хэн гэдгийг би огтхон ч мэдэхгүй ч
Намайг өнөөдөр Ромео болгооч гэж орон дотроо нууцхан хүсэх дуртай

Өглөө бүр би нарыг харах дуртай

2009.10.15 10 цаг 10 мин Энхбаяр

Орондоо

Орондоо

Орон дотроо би байна
Одоо яг л унтах гэж байна
Уянгын зөөлөн аялгууг би сонсонгоо
Ургуулан бодно гэнэтийн учралыг

Хөнжил дотроо би байна
Хөөрхөн дүү нараа бодож байна
Нүдээ аниад л дүү нараа хархаар
Нүүр минь инээмсэглэлээр дүүрэх юм

Шөнө юу зүүдлэхээ би мэдэхгүй
Шүлэг нойронд хэн айлчлахыг би таахгүй
Бодолд минь одоо сайхан зүйлс л урсана
Болдогсон бол шөнө энийгээ зүүдлээсэй

2009.10.13 22цаг 23 мин орондоо, Энхбаяр

Гитар минь

Гитар минь

Тэнгэр бүүдийж бороо шаагисан
Тэнгис цалгилж шуурга шуугисан
Хөшгөө нээгээд л гунигт автах гаслант өдөр
Хөнжил дотроо би банзан гитараа бариад
Хөгжилтэй нь аргагүй дуу аялна

Наран мандаж дулаахнаар инээсэн
Навчис цэцэглэж сэтгэл сэргэсэн
Өглөө босоод л эрч хүчээр халгих өдөр
Өрөөнийхөө буланд гитартайгаа цуг
Өнгөрсөн явдлаа эргэн санан ганихарна

Гитар минь чи улам намуухан дуугарч
Гэгэлзэх сэтгэлийг минь улам бүр донслуул
Гитар минь чи улам уянгалаг исгэрч
Гэрээ санасан надтай хором ч гэсэн хань бол

Гитар минь

2009.10.10 18:23 гэртээ

Элэнц өвөөдөө бичсэн захидал

Элэнц өвөөдөө бичсэн захидал

Тал дүүрэн адууныхаа урдхан
Танан цагаан гэрийнхээ хажуухан
Өвдөг дээрээ гараа тавьлаад
Өөдөөс дулаахан ширтсэн
Өвөг эцэг таньдаа хүү нь
Өр зүрхний халуун угаас
Үзэг цаас нийлүүлэн захиа бичиж сууна
Бурхны оронд ч та минь
Бусдын адил зүгээр суухгүй
Дээд тэнгэрийн түшмэл болоод
Дэндүү завгүй байна гэж би зүүдэллээ
Амгалангийн оронд ч та минь
Алгуур дэмий үл хэвтэж
Ариун тэнгэрийн мянган хүлгийн сурыг
Амрах завгүй элдэн байна гэж зүүдэллээ
Мөхөс хүү чинь
Мөөмнөөс гарах гэж арван есэн жилийг
Мөн ч их танхил өнгөрөөжээ
Муу хүү чинь
Мундаг эр хүн боллоо хорин хоёр нас гэж бархираад
Мунхаг үйлдлийг олон удаа давтжээ
Ажил ч хичээнгүй занг тань би мэдэх ч
Ашиггүйгээр цагийг олонтоо өнгөрөөжээ
Үүнийг хэлэхдээ хүү нь ичэж байна
Үүнээс цааш хичээнээ...
Үгэндээ байхгүй бол та минь
Үе үе зүүдэнд минь ирж хонгон дээр минь алгадаарай

2009.10.03 гэртээ Токио

Зулзаганууддаа

Айл гэрт хүн нэмэгдэх нь
Алтнаас илүү жаргал билээ
Анир чимээгүй суун зурагт харсан
Амьдралын ердийн орчилийг эвдэж
Ангаахай бялзуухай шиг таван дүү минь
Ар араасаа цувран бидэндээ иржээ
Хамгийн бага нь болж дураар эрхэлсэн
Харцаараа бүгдийг эмээлгэсэн намайгаа
Ах болгож та нар минь ичээсэн
Агаа гэж та нар л намайг дуудсан
Хайртай хайртай гэж шулганалдаад
Хамраа үрчийлгэдэг дүү нар минь
Харь улсад агаа нь сурч буй болхоор
Хацрыг нь үнэрлэж өдөр бүр тоглож чадахгүйд уучлаарай
Тэнгис дахь нэгэн завийг ээж аав чинь гэвэл
Тэрийг хөдөлгөх сэлүүр нь та нар юм шүү
Тээр тэнд гэрэлтэх та нарын аз жаргалруу
Тэвчээр заан өдөр шөнөгүй сэлүүрдэдгийг нь бүү мартаарай
Эмээ өвөөдөө инээд бэлэглэгч
Ээж аавдаа эрч хүч хайрлагч та нар минь
Эрүүл энх өсөж бойжоод
Эх орондоо хэрэгтэй хүмүүн болоорой

2009.10.03 Токио гэртээ,Хосоо-г сагс тоглохоор явсан хойгуур бичив.

Бага эгчдээ

Эртний нэгэн шүлгээ бага зэрэг засаж тавьлаа...



Хорвоо надад хайрлаж эрхэлж ,хамгаалж,сонсож яв хэмээн гурван эрдэнэ заяасан билээ.
Самдан Энхбаяр


Хорвоо надад сонсож яв хэмээн заяасан
Хонгор гурван эрдэнийн минь нэг
Сувдан сондор мэт сайхан эгч минь
Сураг чагнан наддаа санаа зовон сууна уу

Хайраас тань гарсан хатуу үгсийг
Хамгаас хэрэггүй хэмээн мулгуйттдаг байлаа
Харин одоо таны минь хэлсэн угс
Хайрт Дэлдэн Баагийд чинь алт мэт санагднам

Хорвоо надад эрхэл хэмээн заяасан
Хонгор гурван эрдэнийн минь нэг
Шижир алт мэт бага эгч минь
Ширхэг ширхэгээр цасан будрах мэт дуу аяланхан байна уу

Хатгаж байна гэж танд ярдаглаад
Хамт унтахаас зугтаадаг байсан ч
Хаврын хахир аянгат шөнөөр
Хайртай эгчийгээ үгүйлэн ганцаар орондоо хөрвөөн байнам

Хорвоо надад хамгаалж яв хэмээн заяасан
Хонгор гурван эрдэнийн минь нэг
Бадмаараг эрдэнэ мэт сайхан эгч минь
Бадаг бадгаар нутгаа санагалзан шүлэг тэрлэн сууна уу

Хажууд тань байж нөмөр болохыг дүү нь хүснэ
Дэргэд тань байж дэм болохыг дүү нь хүснэ
Хэрэв зээ таныг минь хэн нэгэн гомдоох аваас
Хэн ч байсан дүү нь өршөөхгүй
Хэзээ нэгэн цагт хариугий нь барьна

Энэ үг том хоёр эрдэнэд минь ч хамаатай болохыг
Эрх бяцхан дүү чинь тангараглая
Эмээлээсээ нь өндөр морь гэж үгүй
Эгч нараасаа ачтай дүү гэж үгүйг санаж явна
Энхбаяр
Токио,8 сарын 2 ,18:30мин