11 Apr 2014

Дөрвөн сарын бороо


Дөрвөн сарын шиврээ бороонд сэтгэл гэгэлзэнэ
Дөнгөж аялсан шивнээ салхинд нь бодол сэвэлзэнэ...

   Харамлан унагах дусал дуслыг чинь би цэцэг адил түүгээд
   Хайраар дутсан бүхэнд халуун сарнай болгон барихсан...

Дөрвөн сарын анхилуун бороонд одод мансуурна
Дүүлэн шумбах учралын бүжгэнд нь саран согтуурна

   Эгэлгүй сайхан нисэн орох ширхэг ширхэгийг чинь би нандигнан хадгалаад
   Эвдэрсэн зүрх бүхэнд итгэл болгон бэлэглэхсэн...

Дөрвөн сарын шөнийн бороо гунигт автуулна
Дүрслэн хөгжимдөх чимээ анир нь далайд умбуулна

   Чамаас уянгалах харуусал бүрийг  дуу болгон бичээд
   Чимээгүй  хааяа заримынх нь чихэнд тавин сонсгохсон...

 Дөрвөн сарын  энэ нэгэн бороонд нойр хулжина
 Дөлж одсон ахиж ирэхгүйн хариуд мөрөөдөл баяжина

   Унахдаа уусах хоромхон зуураас ухаарлыг мэдэрч
   Урсахдаа татуулах зам бүрээс чинь уучлалыг ойлгоно....

2014.04.11

11 Oct 2013

Согтуу




Хайр бол намар
Намар ирнэ
Намар явна

Намар бол гуниг
Гуниг дуулдаг
Гуниг уйлдаг

Гуниг бол дарс
Дарс амттай
Дарс гашуун

Дарс бол бүжиг
Бүжиг баясам
Бүжиг мансуурам

Бүжиг бол сэтгэл
Сэтгэл гэнэн
Сэтгэл уян

Сэтгэл бол завь
Завь залуургүй
Завь далбаагүй

Завь бол итгэл
Итгэл дуусахгүй
Итгэл бөхөхгүй

Итгэл бол тархи
Тархи бодолхийлнэ
Тархи мэдэмхийрнэ

Тархи бол би
Би мөс
Би гал

Би ингэхэд хайр уу?









11 Oct 2012

13 Jun 2012

Зүрх гэдэг зөрүүд эрхтэн

                                                      













Сэм сэмхэн бодолд автуулна
Үе үехэн зөрчилд умбуулна
Сэрүүн салхины өмнөөс
Сөрж чи алхуулна

Сэтгэл гэдэг гэнэн эрхтэн

Өнгөрсөнд очиж инээд алдана
Өнөөдөртөө ирж санаа алдана
Магад үнэнээс тасран одож
Маргаашт горьдож чимээгүй хүлээнэ

Сэтгэл гэдэг тэнэг эрхтэн

Онгойлгож болохгүй хаалгыг
Онгичиж балбаж нээчихээд
Одоо би гарч чадахгүй нь гэж
Орь дуу тавин орилно

Зүрх гэдэг дураараа эрхтэн

Үг гэдэг өөрийгөө илэрхийлэх
Үйлдэл гэдэг үнэнийг өгүүлэх
Үүнд итгэж ядан
Үүл шиг замхарч одно

Зүрх гэдэг зөрүүд эрхтэн

                                    2012.06.12

28 Oct 2010

Гэнэхэн байна даа




Гэнэхэн байна даа

Цас чи дээрээс зөөлөн будрахдаа
Цагаанаар бүхнийг будна гэж сэтгээ юу
Цайлган байна даа цайлган байна
Хар санаа хээрийн түймэр болон тархаж
Хаа сайгүй орилолдон бүжиж байна

Бороо чи дээрээс шиврэхдээ
Бохир бүхнийг угаана гэж бодоо юу
Болоогүй байна даа болоогүй байна
Шулам дүрт шуналын сэтгэл цаана чинь
Шүхэр дор алгаа ташин дэвхцэж байна

Салхи чи аяархан сэвэлзэхдээ
Саар бүхнийг хийсгэнэ гэж санаа юу
Гэнэн байна даа гэнэн байна
Баг өмссөн адын бодол цаана чинь
Байшин дотроо чамайг шоолон инээлдэж байна


2010.10.28 Токио гэртээ. Энка Энхбаяр

2 Oct 2010

Хяргас нуур


Газар дэлхийд ойсон номин хөх тэнгэр
Галуу шувууд цугласан номхон дөлгөөн рашаан
Хүмүүн заяаг тэтгэх хүслийн хязгаар шиг Хяргас нуур
Хүлээхийн жаргалыг амсуулах холын хайртай амин нуур

Эхийн хэвлий дэх арван сарыг сануулах эрдэнэ минь
Ээжийн аялах зөөлөн бүүвэйг хөгжимдөх долгио минь
Эргээд хоёулаа удахгүй ээж хүү шиг уулзая даа



2010.08.18 Хяргас нуур, Хэцүү хад

30 Sep 2010


Бодолгүй чанадын элсэн далайд
Болоогүй холын салхи исгэрнэ

2010.09.30

7 Feb 2010

Чимээ...


Чихэнд

Компьютерь аахилах
Кондишн уухилах

Чимээ...

Бодолд

Өчигдөр хурхирах
Өнөөдөр архирах
Маргааш бархирах

Чимээ...

Цээжинд

Анхилуун уянгалах
Танхилуун инээлдэх
Энхрий дуулах
Эндээс чагнах

Чимээ...

2010.02.07 00:33 Энхбаяр , Токио

5 Feb 2010

Ирээдүйн найз охиндоо


Ирээдүйн найз охиндоо

Эрхэм хүндэт Энхбаярын найз охин чамд
Энэ өдрийн мэнд хүргэе
Анд минь араас чинь
Утас шиг хөвөрсөн эсэх
Аль эсвэл чи өмнө нь
Ухаан балартсан эсэх
Энэ бүгдийг би асуухгүй ээ
Энхбаяртай л чи одоо цуг байвал болох нь тэр

Хайрт хүндэт Энхбаярын найз охин чамд
Хацар дүүрэн инээмсэглэлээр бэлэг барья
Хайртай гэж шууд хэлэхдээ
Наадах чинь маруухан
Хамаг сэтгэлээ уудлахдаа
Наадах чинь хайнгадуухан
Үсийг чинь үнэрлээд зөөлөн илбэх бүрт
Үг хүлээлгүй хайртай гэдгийн санаарай

Үүрдийн нөхөр Энхбаярын минь найз охин чамайг
Үнэн сэтгэлийн угаас чанга тэврэе
Чамтай уулзатлаа бичсэн шүлэг бүрээс нь
Чанга хатуугаар эзнийг нь бүү нэхээрэй
Үнэндээ найз минь шүлэглэхээс бусдыг чадаагүй юм
Үүр шөнийн ододтой ярилцахаас бусдыг хийгээгүй юм
Арьсаа хамгаалах гэж би бичсэнгүй
Андыг минь илүү ихээр хайрлаарай

2010.02.05 20:00 Токио Энхбаяр

20 Jan 2010

Асуулт


Асуулт

Чиний бодлын байшин дахь
Миний нэгэн өрөө
Чинь зүрхний угаас
Чимж гоёсон тасалгаа юу

Чиний бодлын байшин дахь
Миний нэгэн өрөө
Чамд эртний зүйлийг
Чандалж хадгалсан агуулах уу

Чиний бодлын байшин дахь
Миний нэгэн өрөө
Цэнгэг агаар хааяа амьсгалах
Цэвэрхэн бяцхан тагт уу

Чиний бодлын байшин дахь
Миний нэгэн өрөө
Цааш алхаж зүрхлэмгүй
Цаг зуурын коридор уу

Чиний бодлын байшин дахь
Миний нэгэн өрөө
Бусдад харуулалгүй хаасан
Булангийн цоожтой шүүгээ юу

Чиний бодлын байшин дахь
Миний нэгэн өрөө
Биеэн барилгүй долгиолон
Вино шимэлцэх ванн уу

Чиний бодлын байшин дахь
Миний нэгэн өрөө
Өөрт чинь бэлдсэн өрөөтэй минь
Өөгүй яг адилхан бол
Өнөөдөртөө багтаад би
Өргөөрүү чинь нүүмээр байна

2010.01.19 Токио Цамхаад Самдангийн Энхбаяр

14 Jan 2010

4 бодол


4 бодол

Ялгадас үнэрлэсэн
Ярвагар царай
Нэг инээгээсэй
Яс хөлдөөм
Язалзсан инээд
Нэг уурлаасай
Ялаа үүрлэм
Яршигтай ам
Нэг хамхиасай
Ямар ч хувиралгүй
Япон робот
Нэг нээгээсэй

Цамхаад Самдан Энхбаяр 2010.01.14 16:11 Токио

Санаж байна


Санаж байна

Хүсээд л харьчихгүй алсын орноос
Хүү нь гэрээ санан үгүйлнэ

Адуу тургилах буйдхан хөдөө талд
Аав минь намайг харуулдан суугаа
Эсгий гэртээ дээлийг минь оён
Ээж минь намайг хүлээж суугаа

Хүсээд л харьчихгүй алсын орноос
Хүү нь гэрээ санан үгүйлнэ

Нүцгэн хөлөөр наадан гүйсэн
Газар шороо минь намайг харуулдан байгаа
Нүүдлийн шувуудын зуурдын диваажин
Гайхамшигт нуур минь намайг хүлээж байгаа

Хүсээд л харьчихгүй алсын орноос
Хүү нь Монголоо санан үгүйлнэ

Бүүвэйлж саатуулсан эгч нар минь
Бүлтгэр дүүгээ хүлээж суугаа
Бүтэхгүй жаалуудаас хамгаалдаг ах нар минь
Битүүхэн дүүгээ харуулдан суугаа

Санаад л харьчихгүй тэртээх орноос
Санаа алдан та нарыгаа үгүйлнэ

Бууж өнгөрсөн овоо болгон
Буцаж ирэхийг минь харуулдан байгаа
Ангаагаа тайлдаг ариун булаг минь
Араас минь хараад хүлээж байгаа

Бодоод л оччихгүй холын орноос
Би нутгаа санан гансран сууна

Худал унахад баярладаг зулзаганууд минь
Хоног тоолон ахыгаа харуулдан суугаа
Мөрөөр татдаг хөөрхөн охин дүү минь
Магнайд хүрээд ахыгаа хүлээж суугаа

Алхаад л харьчихгүй алсын орноос
Ах нь дүү нараа санан үгүйлж байна

Хээр талын ариун салхи
Хззээ ирэхийг минь харуулдан байгаа
Хэнэггүй чангаар орилдог уул
Хүн байна уу гэж ахин дэггүйтэхийг минь хүлээж суугаа



Цамхаад Самдан Энхбаяр 2010.01.14 00:00 цаг Токио